AURKEZPENA
Joan den mendearen bukaera aldera, Gipuzkoako lagun batzuk elkartzen hasi ziren intsektuenganako zaletasunak eta grinak bultzatuta. Harik eta 1999an Gipuzkoako Entomologia Elkartea sortzea erabaki zuten arte. Gaur egun, logikoa denez, bazkideetako batzuk baino ez dira gipuzkoarrak, baina elkartearen izenak berdin dirau, haren jatorriari eta jarduera gehienen muinari lotuta.
Lehenengo Zuzendaritza-Batzordea. 1999ko urriaren 8an. Elkartearen jaiotza ospatzeko afaria
Irabazi-asmorik gabeko elkartea da gurea, hastapenetako lagun-taldetxo horren nahiak eta kezkak helburutzat dituena:
1- Gure inguruneko entomofaunaren ikerkuntza.
2- Ezagutza entomologikoen zabalkundea.
Gaur egungo Zuzendaritza-Batzordearen ordezkari batzuk. 2009ko maiatzaren 30an. Sutearen ondorengo lokal berrituan.
Web-orri honen diseinua lantzeko bilera Zornotzan. 2009ko maiatzaren 19an.
Bi aldizkari argitaratzen ditugu, biak seihilabetekariak direnak orain. Izan ere, hauek dira Elkartearen bizitza eta helburuak adierazi nahiz bideratzeko modu nagusia:
1- Heteropterus Rev. Entomol., 2001etik aurrera, zientifikoa.
2- Heteropterus, 2000tik aurrera, dibulgaziokoa.
Elkartearen bestelako jardueren artean, nabarmentzekoa da Aiako Harria Parke Naturaleko entomofauna izeneko proiektua.
Elkarterako izen labur bat bilatzerakoan, Heteropterus lepidoptero-generokoa aukeratu genuen. Alde batetik, atsegina da hitzaren musika eta intsektu-ordena askoren antza dauka. Beste alde batetik, Heteropterus morpheus hesperidoaren banaketa iberiarra Kantauri aldekoa da batez ere, eta “geure-geuretzat” hartzeko modukoa beraz. Gainera, tximeleta honen hegoen kolorazioa penintsularen eremu hezearen Naturaren metaforatzat jo liteke, ageriko uniformetasunaren atzean ezkutuko ezusteak gordetzen baititu...